PLEBISCITO.EU | PNV. Press News Veneto

Frédéric Bastiat l’è stà on grando economista francexe visuo inte la prima metà del XIX secolo. El ne ga lasà opere de maxenga inportansa e raconti curti ca i riese a far verzar i oci sora raxonamenti sbajà, cofà la selebre “Petisión dei fabricadori de candele” che la fa vedar fà el protesionismo el sipia na condana.

Bastiat el dixea che ghe xe “ce qu’on voit et ce qu’on ne voit pas”, cioè che ghe xe coeo che se vede e coeo che no se vede mia. La xente l’è uxà a tegner conto solo dei costi e dei benefici che i se para dinanzi in modo ciaro; inveze, nel so calcolo economego, no la tien mai inamente i costi sconti, i costi che no se vede mia. Bastiat, inte n’altra famoxa storieta intitolà “Raconto de la fenestra rota“, el mete ben in ciaro sto raxonamento falsà e el serca de farne capir che el bocia che’l ronpe la fenestra de la botega l’indirisa la spexa del botegaro verso el vetraro. I schei del botegaro i podea esar doparà par calcosa che al botegaro a ghe interesava dal bon, cioè, dal ponto de vista del botegaro, i podea esar uxà mejo: par calcosa che el gavarìa daxesto on beneficio.

Mi son convinto ca par nialtri Veneti no ghe sipia pexo bocia spaca-veri fà el Stato italian. Sentocuarantatrì ani de spacamento de cojo…ehm, volea dir… de veri contro le nostre pore boteghe. Sentocuarantatrì ani de rubarie ai nostri dani e po gavemo anca da inxenociarse e dir “grasie! grasie! grasie, masa bon!” se na frasión la ne torna indrio. Oltre ai schei che el sevita a robarne, ve rendìo conto del xigante costo sconto che se semo raspà suxo le nostre spale? Ve rendìo conto de cuante enerxie le xe sta strasà par darghe da magnar al Mostro? Do saresimo deso sensa el Mostro italico tacà a le nostre spale? Cuante forse vitali saresele sta indoparà on mucio mejo? Libari de far le nostre sielte sensa el toxo italico malefico che’l ne ronpe i veri, cuanto staresimo mejo?

Penseghe sora. No l’è mia ora de tor par na recia el buteleto e dirghe ciaro che’l ga da desmetar de far dani, che nialtri volemo esar libari de sernìr par conto nostro indove indirisàr le nostre forse, che darghe schei al vetraro a no ne intaresa pì e co i schei risparmià volemo pontar so canpi pì inovativi, par exenpio volemo cronpàr on PC par informatixàr la botega; che semo scuaxi intel 2010 e par colpa del toxeto pestifero semo indrio confà el Terso Mondo. Sì, l’è colpa de chel toxato se i nostri schei i va a finansiar cadaveri boni solo a darghe da magnar ai politici italiani o italo-veneti, cioè parasiti che i sperpera schei in na maniera par niente moral. Parcosa i me schei i xe dovui ndar a Alitalia? Parcosa i me schei (da na vita, ansi, da do vite) i ga da finansiàr in maniera direta e indireta la fabrica de auto de Torìn? Parcosa gaventi da darghe da magnar a doxento exerciti de burocrati afamai che in canvio i me da indrio sol che arogansa e ineficiensa? Poso mia decidar par mi indove che vojo spendar i me schei?

Coeo che se vede i xe i sforsi da musi che i Veneti i ga faxesto par rivàr ndo che i xe rivà sensa aiuti, ansi, co tanti inpedimenti italiani. Coeo che no se vede, ma che nialtri del PNV volemo far vedar a tuti i Veneti, l’è apunto sta bala de fero che gavemo ai piè che la ne ciucia forse vitali e che la ne inpedise de tornar da novo a volar. I costi sconti che semo drio pagar par colpa del Stato italian i xe na roba fora da ogni logica. Sevitar a star drento sto contenitore cadaverico italico l’è na roba fora da ogni logica.

Luca Schenato
Pnv Verona