Veneto Stato par evitar el buxo nero talian

Xioba scorso gò partesipà in prefetura (sic!) a na riunion de coordinamento dełe forse połitiche che partesipa ałe elesion provinciałi de Trevixo. Ła riunion gera organixada dała prefetura stesa, pa concordar “łe regołe de ingagio” tra i partiti pa na sana canpagna eletoral. A parte l’inutilità de riunion de sto tipo, gera cualche dì che me riprometevo de dar conto de un clima da medioevo che se respirava e che me gà sconvolto.

In mexo ai papaveri dełe istitusion e dei partiti me mancava łe parołe e me sentivo un pese fora dal’acua. Tra łe istitusion gera prexenti el vice-prefeto, el vice-cuestor, un comandante dei carabinieri, un toco groso deła finansa (no so el so grado, l’unica roba chel gà dito ła xè stada “a vuliamoce bbene assai”). Tra i partiti ghe gera un fià de tuto, ma scuaxi tuti i gavea el fator comun de na pansa galatica che li faxea tanto somejar ai porsei deła fatoria dei animałi de Orwell.

Rivai tuti o scuaxi taca ła riunion e parla el vice-prefeto chel dixe che se gà da aprovar un documento comun de intexa apunto. “Dato che gli astanti – el taca – avranno già coscienziosamente letto e fatto propria la bozza del documento, ne dò lettura per l’approvazione”. Pecà che invese gnisun gavese leto un’ostia e el motivo el gera che ła prefetura no ła pol far fotocopie de na bosa, parché noi gà schei e i pol far soło che fotocopie del documento definitivo aaprovà.
Mi che intanto gaveo verto el me iPad pa conbatar la noia de na conpagnia de sto tipo, ghe gò dito se i podeva mandar na email, ma el vice-prefeto el me gà risposto “impossibile”, anca se no gò capìo se gera inposibiłe par lu che nol sa doparar le email o cosa. Ała fine i gà decixo de far 3 fotocopie da condividar in grupo de 3-4 persone ognuna…co un raprexentante dei partiti prexenti che se lamentava del scarso consumo de fotocopie, dato che lue l gera el fornitor uficial de canseleria deła prefetura…

Ve risparmio el contenuto de sto documento, che farìa inpałidir Kafka par ła so ingenuità e el so otimixmo sul stato deła burocrasia. L’unico ponto su cui so intervegnùo gera parkè tra i ponti ghe gera el divieto asołuto par łe istitusion de far comunicasion de stanpo propagandistico nel periodo de canpagna eletoral. Sicome che mi gero tacà su twitter, gò dato notisia che 13 menuti prima ła provincia de Trevixo ła gavea pena lancià un tweet cona publisità de un portal internet interativo che gera de pura propaganda.

I prexenti i me gà vardà co do oci che pareva dir “ma cosa xeło drio dir sto ki?”. Me so rexo conto che proprio noi capiva cueło che ghe stavo dixendo. Alora el vice-prefeto el me gà dito “stizzito” che ogni segnałasion de abuxo ła gavea da esar fata tramite apoxito moduło da reperir preso la guardia de finansa.

Va ben me so dito, łasemołi al so mondo. Intanto che ła riunion ndava vanti me ciama Bruno Polli, candidato consilier de Veneto Stato nel colegio de Preganziol-Casier, chel se catava a Zero Branco a tor su i sertificati eletorałi dei sotoscritori deła nostra lista. Sicome che nel’uficio eletoral de Zero Branco noi gera boni de catar na email de sincue dì prima (sic!), i me domandava co urgensa de mandarghine n’altra par ła domanda. Ałora, nel mexo deła riunion, tiro fora el me mac, taco la ciaveta usb pa tacarme a internet e mando l’email richiesta. Intanto che faso cuesto, i prexenti – vardandome – i taca discorar suła gravità deła situasion informatica, che crea problemi parché deso uno da soło el fa el lavoro de diexe, robando posti de lavoro e che no xè giusto che chi che gà na “professionalità” come łori (sic!) i vegna superai da xoveni inprovixai. Dopo i continua a discutar sul pericoło de internet e de facebook e chei gavea visto na puntata de Report cualche dì prima (che mi no gò visto parché gò butà ła televixion nełe scoase, ansi nei rifiuti speciali) che faxeva capir come che atraverso facebook i te ciava łe password del conto corente. N’altro che gavea fioi el taca dir che internet xè el regno dei pedofili (gera un toco che no ła sentivo cuesta). Intanto che sti burocrati e sti pansoni dei partiti taliani i ndava vanti a sparar buełade come cuesta mi gero al telefono co Bruno che me confermava che al’uficio eletoral de Zero Branco stavolta i gera stai boni de verxar l’email, co lu davanti chel controłava.

Gò vosùo contarve sto epixodio minore parché el raprexenta par ben ła situasion del stato talian, chel xè un buxo nero sensa speransa. Pa no fase risukiar da sto buxo nero burocratico, naltri veneti dovemo darse na svejada e ałe prosime elesion provinciai ghemo da darghe un sgorlon al sistema połitico votando e faxendo votar Veneto Stato e Antonio Guadagnini presidente.

E ancuò ve spetemo tuti a Rovigo, par manifestar a suporto de Mattia Giolo candià sindaco a Rovigo pa Veneto Stato, faxendo rinbonbar pa łe strade de Rovigo el nostro sigo VE-NE-TO STA-TO IN-DI-PEN-DENTE!!!!

Gianluca Busato
Candidato consiglier provinciale TV
Veneto Stato