Programa Economico PNV

Par prexentarse ałe regionali 2010 el PNV gà da prexentar on programa par aministrar na regione italiana. Xe giusto dimostrarse in grado de goernar el periodo de tranxision, ma co l’obietivo de far su no stato indipendente gavemo anca el dover de spiegar cosa canbiarà. Sto programa economico el serve par delinear come gestir el surplus de risorse che gavaremo.

El prexente bilancio de ła Regione Veneto

Come xa riportà l’atuałe presion fiscałe in Veneto ła xe de €70 miliardi a confronto de on prexunto totałe de €50 miliardi in servisi publici che dovaria tornarne indrio. Par chi ca ghe intaresa, el Ministero del Tesoro el riporta anca el detalio sia dełe entrate che dełe spexe pa’l Veneto.

Eco on sunto grafico par rendarse conto del divario fra tase e servisi in Veneto, e dełe proporsion dei vari tipi de tase e de spexa.

Pai contabiłi (ma ke no vol nar vardarse el ligo del Tesoro) eco anca na tabeła riasuntiva de sto grafico.

CONTI PUBBLICI REGIONE VENETO (2007)

ENTRATE (€miliardi)

SPESE PUBBLICHE (€ miliardi)

Imposte Dirette 22.5 Previdenza 21.1
Imposte Indirette 22.4 Sanita’ 8.1
Contributi Sociali 18.1 Amministrazione generale 6.2
Altro* 6.4 Istruzione 3.9
Viabilita’ 1.2
Altro** 10.2
TOTALE 69.5 TOTALE 50.8

*Altre Tase: su imobiłi, loteria, bołi auto…
**Altre Spexe: difesa, energia, telecomunicasioni…

El primo bilancio del prosimo Stato Veneto Indipendente

Tegnemo par vero che al momento ne riva €50 miliardi de servisi publici (ghe xe dei problemi metodołogici che fa pensar che sipia tanto de manco). Ametemo anca che ntei primi ani l’aministrasion publica veneta ła sarà altretanto ineficente de cueła romana (e che no ghe sarà da subito sparagni dovui a na riorganixasion statałe). Come minimo gavarémo €20 miliardi de surplus da gestir, o co manco tase, o co pì servisi publici. €20 miliardi i xe el dopio de l’atuałe budget deła Regione Veneto, e xe probabiłe che el surplus del futuro Stato Veneto el sarà anca tanto de pì.

Gavarémo l’inbaraso de no poder sbasar masa łe tase tuto de colpo par no crear na presion inflasionistega nte ła nostra economia. Gavarémo anca masa risorse par investir sol nostro sistema sanitario, so łe nostre scołe, e podaremo anca parmetarse de finalmente dar na pension dignitoxa ai nostri anziani.

Rispeto al grafico precedente sbasando łe entrate fiscałi (manco tase) e alsando ła spexa (pai amici libertari: l’Italia ne łasarà in braghe de teła, e gavemo da pagar dotori e maestre) otegnaremo on biłancio dei conti publici.

CONTI PUBBLICI STATO VENETO (2012)
ENTRATE (€ miliardi) SPESE (€ miliardi)
Imposte Dirette 19.2 -15% Previdenza 22.2 +5%
Imposte Indirette 16.8 -25% Sanita’ 10.6 +30%
Contributi Sociali 13.6 -25% Amministrazione generale 6.2
Altro* 6.4 Istruzione 5.1 +30%
Viabilita’ 1.6 +30%
Altro** 10.2
TOTALE 55.9 -20% TOTALE 55.8 +10%

*Altre Tase: su imobiłi, loteria, bołi auto…
**Altre Spexe: difesa, energia, telecomunicasioni…

Ridusion de ła presion fiscałe

Ła presion fiscałe calarà de presapoco el 20% (dai €70 miliardi de tase che ne cavava i taliani, a imediatamente €55 milardi ntei primi ani de indipendenza).

A. Le inposte indirete łe vegnarà ridote del 25%. Vol dir che l’IVA ła vegnarà sbasà da l’atuałe 20% a on 15%. De primo inpato xe mejo no sbasar de pì par spetar che el marcà el se adegui (e che ulteriori taji no i vegnà conpensà da margini pì alti dei rivenditori). Dopo spetarà a ogni provincia decider se sbasar o alsar ła propria IVA secondo on vero sistema federałe. Ma intanto, co no Stato Veneto Indipendente tuti i prodoti i costarà de paca el 5% de manco.

B. I contributi sociałi no i vegnarà pì prełevà diretamente dal datore de laoro, ma i vegnarà mesi in busta paga (come che i fà in Danimarca). Vol dir che on operaio che in neto el fa €1200 al mexe, e che in lordo se vedeva €1900 al mexe, co no Stato Veneto Indipendente el gavarà in busta paga el vero lordo (cuanto che lu vałe par el paron) de €2500. I contributi sociałi i vegnarà ridoti del 25%, e invese de pagar €600 el versamento pal nostro operaio sarà de €450. Ntei primi ani i vegnarà versà al Stato Veneto, ma pena ca se organixemo, ogni laorator el podarà anca afidar i versamenti par ła so pension a na asicurasion previdensial privà.

C. Come inposte direte gavaremo a l’istante na tasa unica e fisa al 20% (dopo probabiłe che ne tocarà sbasarla ncora par via de l’inevitabile ciclo virtuoxo dovùo a sto stimoło economego che ne regałarà ulteriori surplus). Portar łe tase sul redito al 20% no vol dir on tracoło dełe entrate fiscałi. Par via deła mixera distribusion del redito in Italia, tanti xa i paga poco de pì. El nostro operaio del punto precedente al momento el pagarà on 27% de tase sul so stipendio. L’inpato totałe sarà on –15% su łe case del stato.

In concluxion el nostro operaio el se catarà €2500 in busta paga, e in neto, cavandoghe €450 de contributi e €400 de tase (al 20%), el gavarà €1700. Rispeto ai €1000-1200 de deso, xe on bel 50% in pì par nar far ła spexa e pagar el 5% de manco (efeto IVA sbasà) su tuto.

Sta ki no ła xe mia fantaeconomia. Ła se ciama aritmentica. Gavemo da rendarse conto de cuanto che ne costa restar in Italia, par capir parchè in volta par l’Europa ghe xe pì benesere.

Aumento servisi publici

Anca co tuta ste tase de manco ne resta €5 miliardi abondanti de surplus che podaremo inpiegar co na cresita media dei servisi publici del 10%. Xe vero che ghe xe tanti sprechi, ma xe anca vero che l’Italia ne ga ridoto a servisi publici vargognoxi.

A. Podemo benisimo parmetarse de aumentar imediatamente del 30% ła spexa publica par ła sanità (da €8.1 a €10.6 miliardi). Par asicurarse che no i finisa sui soliti apalti de dubia necesità, sto incremento el gà da nar par ła magior parte sul personałe: pì dotori e infermieri, e pagà decixamente mejo. No se rendemo conto ma confronto ai stati industriałixà i nostri dotori e infermieri i vien pagà tanto de manco. Gavemo el dovere da asicurarghe na paga dignitoxa pa’l servisio che i presta.

B. Gavemo el dovere de investir pexantemente su l’istrusion. Minimo on 30% in pì par scołe e università (da €3.9 a €5.1 miliardi). Vegnendo fora da on sistema retrogade, investir imediatamente €1.2 miliardi in pì su łe nostre scołe xe obligatorio. No soło par el stipendio dełe nostre maestre e dei profesori dei licei, ma anca par incentivar ła ricerca nte łe nostre università, che ga da servir da suporto par łe nostre industrie. Al momento semo tanto indrio in investimenti su ricerca e svilupo, ma tanto; ultimi in Europa.

C.  30% de fondi in pì par ła viabiłità. €400 milioni in pì par strade, treni e areoporti no i xe gnanca masa. Fondamentałe che sti schei no i vegna gestìi a liveło centrałe, ma i gà da vegner aministrà diretamente dai comuni. Cuesto par evitar apalti de opere faraoniche, co che gavemo necesità de manutension (dar na man de bianco ałe strike pedonałi, stropar i buxi su l’asfalto…) su tuto el teritorio.

D. Anca co tuti sti miliardi spexi in pì, ne resta bastansa anca par comodamente alsar ła pension ai nostri anziani de on 5% (da €21.1 a €22.2 miliardi par ła previdenza). Nel conpleso on pensionà el gavarà na pension pì alta del 5% e dei prezi del marcà pì basi del 5% (efeto IVA). On 10% de benesere in pì par pasar na vekiaja serena, e consołarse de łe perdite sui BOT italiani che i se gà ostinà a tegner fin l’ultimo.

Anca tegnendo da conto sta ridusion de tase, e sto generoxo aumento de spexa piovega, el bilancio veneto el resta in surplus de €159 milioni, presapoco el 0.1% del Pil veneto.

Sto ki xe el programa pai primi ani de gestion dei conti publici del Stato Veneto Indipendente. No xe fantaeconomia, a xe aritmetica. Sti calcołi i se baxa su l’enorme divario de risorse prełevà ai veneti dal stato italian, e łe xe cifre uficiałi del Ministero del Tesoro. El programa se limita a gestir sto surplus de risorse, sensa tegner da conto de ulteriori sparagni dovùi a na aministrasion veneta pì eficente. No se tol in considerasion el ciclo virtuoxo che se creerà par l’economia veneta grasie a manco burocrasia, manco tase, e pì investimenti su nove industrie che stimolarà ła creasion de novi posti de laoro ben pagà e de cualità.

Se vołemo, sto ki xe el futuro che ne spèta. Nemo tórseło.

Lodovico Pizzati
Presidente – PNV

written by

The author didn‘t add any Information to his profile yet.