E ndoe xeło Zaia?

Video del’aluvion de Vicensa, situasion del Bachiglion a Padova, piena a Montebelo

Video dela Piave in piena

Vicensa soto acua, el reportage de VeNETvision

In sto longo fine e bagnà fine setimana dei morti, in Veneto a xè capità e sta ancora capitando de tuto. Vicensa soto acua, el Veronexe alagà, paexi intieri come Caldogno aluvionai e deso ancora ła paura forte nel padovan par la pena del Bachiglione e ła Piave che a taca a esar bruta come che ła sa far eła.

Da on ponto de vista numerico ła piova de sti dì ła xe stada intensa e continua, ma no straordinaria. A ogni novenbre xe normałe registar 3-4 dì de piova. Se gavarà anca siolto un fià de neve, ma no podemo parlar de precipitasion al de fora deła norma.

Piena Bacchiglione a Padova (fonte: youreporter.it)

El problema el xè n’altro. E ben pì grave.

El fato el xe che cueło Veneto el xè un sistema idro-geologico dełicato. Ło saveva ben i nostri veci. Ło saveva ben anca el Veneto Stato, co che’l gera indipendente.

Montagne, cołine, fiumi, pianure scavae e plaxmae dałe exondasion de mełiari de àni łe testimonia ła natura dinamica e viva del nostro teritorio. Se l’omo nol sa goernar sti procesi, xe ła natura ke se ciapa el so spasio, da soła. Netar i arxeri dei fiumi, tegner i leti soto controło, se serviva anca sospar el corso. Tute ste robe łe vegneva fate regolarmente e sensa ła tecnologia e łe posibiłità che ghemo al dì de ancuò.

E no stemo dir che manca i schei. Naltri Veneti a semo na potensa economica, che podarìa star al pari e de pì de stati che el so teritorio i ło cura par ben, tipo l’Austria, ła Finlandia, Israele, ła Slovenia, ła Svesia, ła Svisera, soło pa nominar i primi che ne vien in a mente. Soło che ste risorse – e ło savemo ben – e ne vien robae ogni dì da soto el naxo, grasie ała cołaborasion dei połitici veneti che i tien el saco ai ladri de sto stato małedeto.

Ma ła roba ancora pì grave ła xe che pa ver controło su sti procesi, a dovarisimo ver ła posibiłità de intervegner a liveło STRATEGICO. Dovarisimo ver ła cosiensa che cueło Veneto el xè un sistema idro-geologico particołar e che’l gà bixonio de esar goernà ki e da naltri.

A xè ciaro che su sti aspeti naltri veneti no ghemo proprio nisun controło. Sti afari i vien decixi e i xe de conpetensa de istitusion sentrałi come i prefeti, o el genio sivil. Anca el magistrato dełe acue, che neła Serenisima el gavea pì poter anca del Doge, da naltri nol conta gnente. El xe soło che un burocrate che ciapa un stipendio a ufo. Cualke mexe fa a gaveo asistìo a un dibatito publico organixà a Susegana da un comitato local de inprenditori sul fiume Piave. A ghe gera un tavoło de autorità, ndoe che i gera sentai tuti, dała provincia de Trevixo, al genio sivil, al consorsio de bonifica, al’autorità de bacino. E tuti i gà fato a gara a dir che i gera preocupai par ła situasion de incuria deła Piave, ma che noi podeva far gnente parché gera colpa de cualcun altro.

Tuti che se ne gà łavà łe man, fregandosene. E cuesto purtropo el val par tuti i bacini idrografici veneti, gnisun escluxo.

Cuel che ne manca xe na vixion strategica, de insieme su sti aspeti fondamentałi che regoła ła nostra vita nel Veneto. Sta mancansa ła xe ancora pì grave del ladrocinio cuotidian e continuo dei nostri schei e dełe nostre speranse.

Se no capimo che dovemo vardar al Veneto Stato no come a na colonia da aministrar, magari stando al caldo a magnar e castagne e sajando el vin bon intanto che metà deła nostra Patria ła xè soto acua, ma come al ben supremo, chel merita de esar curà co na vixion de tuti i aspeti, dała sicuresa, ała salvaguardia del teritorio, ała vixion de insieme che soło naltri veneti podemo ver.

Come fało un prefeto mandà da na capitałe lontana, che col ne sente parlar a ghe serve i sototitołi, a sovraintendar a cuestion de vita o de morte come cuełe che tanti nostri conpatrioti veneti i sta vivendo in ste ore, in modo dramatico? E ndoe gerelo el “nostro” goernator Luca Zaia in sti dì? No ne par de verlo sentìo cola frecuensa e capasità de comunicasion straordinarie che pa altre cuestion el sa doparar ben.
No xè cativeria, a xè soło che el bon senso de vołerse ben. E par far el nostro ben a ne serve ła testa, ancora prima dei schei. E ła testa ła podemo ver soło che col’indipendensa.

Gianluca Busato
Press News Veneto