PLEBISCITO.EU | PNV. Press News Veneto

El PNV se prexenta come partito trasversałe ałe ideołogie parké dixemo ke na volta indipendenti gavaremo tute le risorse par sbasar łe tase, par ver pì servisi, par alsar łe pension. Insoma, g’in’è par tuti i gusti ideołogici. De contro no i pol altro ke dirne ke demo i numari e ke femo altro ke promese ełetorałi.

Ałora, demołi par davero sti numari, de precixo cuei dei Conti Pubblici Territoriali del Ministero del Tesoro, disponibiłi dal 1996 al 2007.

Sto grafico ve fà vedar ła torta de tase ke el totale de veneti (4 milioni 885 mila àneme, secondo l’Istat) i paga de tase ogni ano.

De precixo, dei 69 miliardi e 450 milioni de euro ke i veneti i paga de tase: a) un terso el vien da inposte direte (tase tipo l’irpef) e de precixo 22 milardi e 541 milioni de euro; b) un terso el vien da inposte indirete (tase tipo l’IVA) e de precixo 22 miliardi e 380 milioni de euro; c) un cuarto el vien da contributi sociali (ke xe senpre na tasa sul stipendio del laoratore, ma pagà diretamente dal datore de laoro), e d) el resto xe balzelli vari.

De tuti sti skei, cuanti xe ke ne torna indrio? Eco on paragon grafico, senpre secondo el Ministero del Tesoro, de cuanto ke ghe demo ai nostri aministradori taliani, e cuanto ke ne torna indrio (e in ke maniera ke ne torna indrio, detalio molto inportante).

La bara rosa raprexenta i €70 miliardi (€69.45 ntel 2007 par la precixion) ke ghe paghemo de tase. I skei ne torna indrio par darne servisi publici in diverse maniere: a) na parte i vien dà diretamente ała Regione Veneto (€9.5 miliardi – la bara blu); b) na parte i vien dà a aministrasioni locałi come comuni e province venete (par on totale de €6.3 miliardi– la bara verde), e c) ła xe na “stima” (co na metodołogia sbalià – dopo ve spiego) ke el Tesoro fà dei servisi centrałi (tipo ła difexa) ke ghe riva al Veneto (€34.9 miliardi – la bara grixa).

Da sto grafico podemo védar parké se sente informasion contrastanti su cuanto ke ne ciucia via ogni ano. Se paragonemo soło ła spexa regionałe se podaria dir ke ne torna indrio soło un setimo de cuanto paghemo (9.5 miliardi rispeto a 70 miliardi de entrate fiscałi in Veneto). Invese, se paragonemo i skei de Regione, comuni e province (bara blu + bara verde) vedemo ke ne torna indrio fra un cuarto e un cuinto (15.8 miliardi su 70 miliardi pagà). Cuesto xe cuelo ke podemo dir co certesa, parkè xe spexa publica fata da aministrasioni venete.

Giustamente però ghe xe spexa centrałixà fata dal governo italian ke in teoria ne da on servisio a tuti i citadini del stato talian (veneti incluxi). Come calcolar ła nostra parte? El Tesoro el stima ke ai veneti ghe torna indrio €34.9 miliardi, e donca sui 70 miliardi ke paghemo, ogni ano ne torna indrio €50.7 miliardi (34.9+9.5+6.3). Secondo łori ne frega “soło” €20 miliardi l’ano (69.45 pagà meno sti 50.7).

Però ghe xe on problema metodołogico col loro calcolo. No savendo come fare a sudividere ła spexa taliana, i gà vardà a dove ke ła nava a finire. Par exenpio, se ghe xe na pì alta concentrasion de caxerme de carabinieri in Veneto, ghe sarà na pì alta concentrasion de spexa par ła Difesa pai veneti. N’altro exenpio, se on ente publico (dixemo come l’AGCM co sede a Roma) ga da ordinar careghe e scrivanie par tuti i so statałi, e łi ordina da on mobiłificio de Verona, el Tesoro considera sta spexa come on trasferimento al Veneto. Femo on exenpio pì estremo par sotołinear sta asurdità: se el Ministro degli Sprechi vol cronparse on panfiło de 50 metri par nar in volta pa’l Mediteraneo, e ghe toca cronparlo da on cantiere navałe veneto, sto transfer el vien considerà spexa publica pai veneti. Lori i ga on servisio gratis, e in contabilità ne fa credar de farne on favore parkè i ne dà laoro.

Par capir mejo ła fregatura, femo on paragon co ła provincia autonoma de Bolzano. Ło savìo ke i tirołexi i riceve indrio soło cuanto ke i paga de tase, e no on skeo de pì? Paragonè el seguente grafico co cueło pa’l Veneto.

I tirołexi i xe diexe volte de manco de naltri (498 miła àneme, par ła precixion), e i paga diexe volte manco de tase (€7.9 miliardi – bara rosa). Anca łori i riceve manco de cuanto ke i paga: secondo el Tesoro ghe torna indrio €7.7 miliardi (bare blu, verde e grixa). Ła difarensa coi veneti xe ke invese de ver 1/5 ke ghe torna indrio ałe aministrasion łocałi, łori i pol gestirse el 60% dełe so risorse. Soło on 40% (i €3.4 miliardi deła bara grixa) i xe i skei ke in teoria ghe torna indrio par servisi del stato talian. Donca, la difarensa de cuałità de servisi ke vedemo fra Veneto e Bolzan, no xe parkè łori i riceve pì skei, ma parkè łori i ga ła posibiłità de gestirse autonomamente na percentuale magiore dei so skei.

Vol dir ke keła bara grixa no xe servisi ke veramente ne torna indrio, e ła stima del Tesoro ła xe metodołogicamente sbalà. Ma femo anca finta de si. Resta senpre ke ogni ano paghemo €69.45 miliardi, e ne torna indrio €50.7 miliardi. Ogni ano far parte del contenitor Italia ne costa €18.75 miliardi, secondo łe pì roxee (ma sbalià) previxioni del Tesoro.

Vol dir ke par ognun dei 4855548 abitanti deła Regione Veneto (veci e putèi incluxi), l’unità d’Italia ne costa €3862 a testa, ogni ano. A xe €322 al mexe.

€322 al mexe in pì in busta paga par l’operaio, €322 al mexe in pì de pension par ła nona, €322 al mexe in pì par la maestra, €322 al mexe in pì par l’infermiere, €322 al mexe in pì de istrusion scolastega par ogni scołaro, €322 al mexe in pì de servisio sanitario par l’invałido, €322 al mexe de manco de tase par el botegaro, €322 al mexe in pì pa’l dixocupà, €1288 al mexe in pì par na fameja de 4 persone. Come manco tase, o come pì servisi, gavarisimo tuti €322 al mexe in pì.

Cuesto xe cuanto ne costa ogni mexe come veneti far parte del stato talian, secondo i calcoli sbalà del Ministero del Tesoro steso. Na me stima a ocio invese ła xe de €1000 in pì al mexe ke ogni veneto gavarà come citadino de no stato veneto indipendente.

Demo i numari? Si, demo proprio i numari, cuéi veri però.

Lodovico Pizzati

Presidente – PNV